GTA VI o'yinlar uchun yangi narx standartini belgilashi mumkin

Warhorse Studios asoschisi Martin Klimaning fikricha, qimmatlashib borayotgan o'yin sanoati inqirozdan chiqish uchun GTA VI narxlariga tayanmoqda.

Warhorse Studios asoschilaridan biri Martin Klima videoo'yinlar sanoatida narxlarni oshirish vaqti kelganini va buni faqat Grand Theft Auto VI kabi yirik loyihalar boshlab berishi mumkinligini bildirdi. Uning so'zlariga ko'ra, hozirda o'yin yaratish narxi keskin oshgan va narxlarni ko'tarish biznesning omon qolishi uchun zaruriy qadamga aylangan.

Sanoat duch kelgan moliyaviy qiyinchiliklar

PC Gamer nashriga bergan intervyusida Klima GTA VI seriyasiga shaxsan qiziqmasligini, biroq loyihaning narx siyosatini diqqat bilan kuzatayotganini tan oldi. Uning ta'kidlashicha, bugungi kunda o'yinlarni ishlab chiqarish xarajatlari rekord darajada o'sgan, biroq studiyalar xarajatlarni qoplash uchun yangi moliyaviy manbalarga ega emas. O'yinchi auditoriyasining o'sishi deyarli to'xtagan, raqamli savdo maydonchalari o'z cho'qqisiga chiqqan, an'anaviy chakana savdo esa deyarli barbod bo'lgan.

Narxlarni ko'tarishdan qo'rqish

Martin Klimaning so'zlariga ko'ra, yagona chiqish yo'li bu nusxa narxini oshirishdir, biroq ko'pchilik ijodkorlar xaridorlarning e'tirozidan qo'rqib, bu qadamni tashlashga jur'at eta olmaydi. U Rockstar Games va Take-Two kompaniyalari bozorda bunday o'zgarishlarni amalga oshirishga qodir bo'lgan yagona kuch ekanini ta'kidladi. Agar ular yangi narx siyosatini muvaffaqiyatli joriy etsa, boshqa studiyalar ham bu yo'ldan borish imkoniyatiga ega bo'ladi.

Avvalroq Grand Theft Auto VI o'yinining narxi e'lon qilingandi. Unga ko'ra, loyihaning bazaviy versiyasi 80 dollar, maxsus Ultimate-nashri esa 100 dollar etib belgilandi. Ushbu narx siyosati jamoatchilik orasida turli bahslarga sabab bo'lgan edi. O'yinning rasmiy relizi 2026-yil 19-noyabrga rejalashtirilgan bo'lib, u dastlab PlayStation 5 va Xbox Series X|S konsollarida sotuvga chiqadi. Hozircha kompyuter uchun versiya haqida hech qanday rasmiy ma'lumot berilmadi.